Today world news 6.12.19

Discussion in 'Memes and Funny Videos - Daily Updates' started by NATHIYAMOHANRAJA, Dec 6, 2019.

  1. NATHIYAMOHANRAJA

    NATHIYAMOHANRAJA Well-Known Member

    Joined:
    Jul 27, 2018
    Messages:
    7,600
    Likes Received:
    523
    Trophy Points:
    113
    Gender:
    Female
    Occupation:
    HOME MAKER
    Location:
    CHENNAI
    பெண்களின் பாதுகாப்பை உறுதிசெய்ய உதவும் எளிய தொழில்நுட்பங்கள்

    தெலங்கானா, தமிழ்நாடு, ஜார்கண்ட் என பல்வேறு மாநிலங்களில் கடந்த சில நாட்களாக பெண்கள் கூட்டு பாலியல் வல்லுறவுக்கு ஆளாக்கப்பட்டு, மோசமான முறையில் கொலை செய்யப்படும் சம்பவங்கள் செய்திகளை ஆக்கிரமித்து வருகின்றன.

    எப்போதெல்லாம் பெண்களுக்கு எதிரான அநீதி இழைக்கப்படுகிறதோ அப்போதெல்லாம் இதற்கு காரணமானவர்களை தண்டிப்பது தொடங்கி, சமூக கட்டமைப்பு, கல்வி, குழந்தை வளர்ப்பு, ஆடை, பழக்கவழக்கம், அரசு நடவடிக்கை உள்ளிட்ட பல்வேறு அம்சங்கள் குறித்து விவாதிக்கப்படுகின்றன.

    பெண்கள் தங்களுக்கு அச்சுறுத்தல் ஏற்படும்போது அதிலிருந்து தப்பிப்பதற்கு வழியாக தற்காப்பு கலைகள், பெப்பர் ஸ்பிரே உள்ளிட்டவை முன்வைக்கப்பட்டு வருகின்றன. அதே நேரம், நாளுக்குநாள் வளர்ந்து வரும் தொழில்நுட்பத்தை கொண்டு பெண்களின் பாதுகாப்பை உறுதிசெய்ய முடியாதா? என்ற கேள்வியும் எழுகிறது.

    அந்த வகையில், செலவே இல்லாமல் அல்லது சில ஆயிரங்கள் செலவில் பெண்களின் பாதுகாப்பை ஓரளவுக்காவது அதிகரிப்பதற்கு பல்வேறு தொழில்நுட்பங்கள் இருக்கத்தான் செய்கின்றன. இதோ அவற்றில் சில:


    திறன்பேசி

    இன்றைய நாளில் திறன்பேசி இல்லாதவர்களே இல்லை என்று சொல்லக் கூடிய அளவுக்கு அவற்றின் பயன்பாடு நகரம், கிராமம், படிப்பறிவு உள்ளவர்கள், படிப்பறிவற்றவர்கள் என்று எவ்வித பாகுபாடும் இன்றி காணப்படுகிறது.

    அந்த வகையில், நமது கைகளில் பெரும்பாலான வேளைகளில் இருக்கும் திறன்பேசியில் 'அவசரகால அழைப்பை' பயன்படுத்தி நீங்கள் உதவியை (காவல்துறை அல்லது தனிப்பட்ட நபர்கள்) நாட முடியும்.

    பெரும்பாலான திறன்பேசிகளில் உள்ள 'பவர் பட்டனை' மூன்று அல்லது ஐந்து முறை விட்டுவிட்டு அழுத்துவதன் மூலம் இந்த சேவையை நீங்கள் பயன்படுத்த முடியும். இதன் மூலம், நீங்கள் யாரை அழைக்க விரும்புகிறீர்கள் என்பதை உங்களது தனிப்பட்ட விருப்பத்திற்கு ஏற்ப தெரிவு செய்ய முடியும்.

    ஒருவேளை மேற்கண்ட முறை உங்களுக்கு பிடிக்கவில்லை என்றாலோ அல்லது வேலை செய்யவில்லை என்றாலோ 'Women safety apps' என்று உங்களது கூகுள் பிளே ஸ்டோரிலோ அல்லது ஆப்பிள் ஆஃப் ஸ்டோரிலோ தேடி நல்ல, நம்பகமான செயலியை திறன்பேசியில் பதிந்துகொள்ளுங்கள். இதுபோன்ற மூன்றாம் தரப்பு செயலிகள் மூலம், இன்னும் பல்வேறுபட்ட செயல்பாடுகளை மேற்கொள்ள முடியும்.

    உதாரணமாக, உங்களது திறன்பேசியை ஒரு குறிப்பிட்ட முறைகள் அசைப்பதன் மூலமாக, நீங்கள் தெரிவு செய்த நபர்களுக்கு உடனடியாக எழுத்து/குரல்/காணொளியுடன் கூடிய குறுஞ்செய்தி உங்களது இருப்பிடம் (ஜிபிஎஸ்) குறித்த தகவலுடன் பகிரப்படும். நீங்கள் விரும்பும் பட்சத்தில் உங்களது இருப்பிடத்தை எந்நேரமும், விரும்பும் சிலருடன் பகிர்ந்து கொள்ளும் வசதிகளையும் பல்வேறு செயலிகள் வழங்குகின்றன. இதுபோன்ற பல்வேறு வசதிகளை கொண்ட செயலிகளை அனைத்து இயங்கு தளங்களிலும் இலவசமாகவும், சில நூறு ரூபாய் செலவிலும் பயன்படுத்த முடியும்.

    ஆபரணங்களும் உங்களுக்கு உதவும்!

    திறன்பேசிக்கு அடுத்து பெரும்பாலான பெண்கள் அணியும் ஆபரணங்களை கொண்டு பாதுகாப்பை அதிகரிக்க முடியும் என்றால் நம்புவீர்களா? ஆம், இது சாத்தியம்தான், ஆனால் உங்களிடம் ஏற்கனவே இருக்கும் அணிகலன்களை பயன்படுத்த முடியாது. இதற்கென சந்தையில் உள்ள மின்னணு அணிகலன்களை நீங்கள் வாங்க வேண்டியிருக்கும்.

    உதாரணமாக, டெல்லியை தலைமையிடமாக கொண்டு செயல்படும் தனியார் நிறுவனம் ஒன்று, பெண்கள் அணியும் செயினை ஒத்த பாதுகாப்பு கருவியை தயாரித்துள்ளது. அதாவது, நீங்கள் அந்த செயினை கழுத்தில் அணிந்தால் அது சிறிது சந்தேகமும் இன்றி உண்மையான செயினை போன்றே காட்சியளிக்கும். ஆனால், அந்த செயினின் மையப்பகுதியில் இருக்கும் கல்லை (உண்மையில் இது ஒரு பட்டன்) அழுத்துவதன் மூலம், உடனடியாக உங்களது இருப்பிடத்துடன் (ஜிபிஎஸ்) கூடிய எச்சரிக்கை செய்தி நீங்கள் தெரிவு செய்ய நபர்கள் மட்டுமின்றி, அருகிலுள்ள காவல்துறை கட்டுப்பாட்டு மையத்திற்கு அனுப்பப்படும்.

    இதே போன்று பல்வேறு வசதிகளை கொண்ட, திறன்பேசியே தேவைப்படாத கைக்கடிகாரங்கள், கைக்காப்பு (பிரேஸ்லேட்), சாவிக்கொத்துகள் உள்ளிட்டவை சந்தையில் கிடைக்கின்றன. சுமார் 3,500 ரூபாய் விலையில் இணையத்திலேயே இவற்றை எளிதில் வாங்க முடியும்.

    மின்னதிர்ச்சி கொடுக்கும் கருவிகள்

    அமெரிக்கா போன்ற சில நாடுகளில் பெண்கள் தங்களது பாதுகாப்பிற்காக துப்பாக்கிகளை வைத்திருப்பது என்பது சாதாரணம். அந்த வகையில், இந்தியா போன்ற நாடுகளில் பலர் சாதாரணமாக வைத்திருக்கும் கருவியான மின்விளக்கை (டார்ச்) பயன்படுத்தி பெண்கள் தங்களது பாதுகாப்பை அதிகரிக்க முடியும். எப்படி என்று யோசிக்கிறீர்களா?

    சாதாரண மின்விளக்கை போன்று காட்சியளிக்கும் நவீன ரக பாதுகாப்பு மின்விளக்குகள் வெளிச்சத்தை கொடுப்பது மட்டுமின்றி, உங்களை தற்காப்பதற்கு மின்னதிர்ச்சியையும் (ஷாக்) வெளிப்படுத்தும்! ஆம், திறன்பேசிகளை மின்னேற்றம் (சார்ஜ்) செய்வதை போன்று இவற்றை மின்னேற்றம் செய்து கொள்ள முடியும். அடிப்படையில் மின்விளக்காக பயன்படுத்துவதுடன், நீங்கள் ஒரு குறிப்பிட்ட பொத்தானை அழுத்துவதன் இதிலிருந்து வெளிப்படும் மின்னதிர்ச்சி படும் ஒருவரை, சில நொடிகளுக்கு நிலைக்குலைய செய்துவிடும் என்று தயாரிப்பு நிறுவனங்கள் நம்பிக்கை தெரிவிக்கின்றன.

    இதுபோன்ற மின்விளக்குகளை ஆயிரம் ரூபாய்க்கு குறைவான நிலையில் இணைய தளத்திலேயே வாங்கிவிட முடியும்.
     
  2. NATHIYAMOHANRAJA

    NATHIYAMOHANRAJA Well-Known Member

    Joined:
    Jul 27, 2018
    Messages:
    7,600
    Likes Received:
    523
    Trophy Points:
    113
    Gender:
    Female
    Occupation:
    HOME MAKER
    Location:
    CHENNAI
    விமானப் பயணம் மேற்கொள்ள மிகவும் ஆபத்தான நாடு எது தெரியுமா?

    பயண முறைகளிலேயே விமானப் பயணம் பாதுகாப்பானதாக கருதப்பட்டாலும், சில நாடுகளின் வலுவற்ற விதிமுறைகள் மற்றும் மோசமான நிலப்பரப்பினால் அதுவும் கூட உயிரிழப்புகளை ஏற்படுத்தக் கூடியதாக மாறக் கூடும்.


    காங்கோ ஜனநாயகக் குடியரசில் அண்மையில் ஏற்பட்ட இரண்டு விபத்துகள் அங்கு விமானப் பாதுகாப்பு குறித்து கவலைகளை எழுப்பியுள்ளன.

    கடைசியாக கடந்த நவம்பர் மாதம், காங்கோவின் கோமா நகரத்திலுள்ள வீடுகளில் விமானம் ஒன்று விழுந்து விபத்துக்குள்ளானதில் 27 பேர் உயிரிழந்தனர்.

    இந்நிலையில், டி.ஆர். காங்கோவில் விமானப் பயணம் மேற்கொள்வது எவ்வளவு பாதுகாப்பற்றது என்பது குறித்தும், அதே சூழ்நிலையில் உலகின் மற்ற நாடுகளின் நிலவரத்தையும் அலசுகிறது இந்த கட்டுரை.
    விமான விபத்துகளுக்கு காரணம் என்ன?
    விமானங்களின் பாதுகாப்பு குறித்த தகவல்களை நிர்வகித்து வரும் 'ஏவியேஷன் சேப்டி நெட்ஒர்க்' எனும் அமைப்பின் தரவுகளின்படி, 1945ஆம் ஆண்டிலிருந்து இதுவரையிலான காலகட்டத்தில், ஆப்பிரிக்காவிலேயே டி.ஆர். காங்கோவில்தான் அதிகளவிலான விமான விபத்துகள் நடந்துள்ளதாக தெரிகிறது.
    [​IMG]

    டி.ஆர். காங்கோவில் அதிகளவிலான விமான விபத்துகள் நிகழ்வதற்கு அதன் வலுவற்ற விதிமுறைகள், நிலப்பரப்பு உள்ளிட்ட பல்வேறு காரணங்கள் இருக்கலாம் என்று கூறுகிறார் யூனிவெர்சிட்டி ஆஃப் நார்த் டக்கோட்டாவை சேர்ந்த டேனியல் குவாசி அட்ஜெகம்.

    டி.ஆர். காங்கோ நாட்டின் தலைநகரான கின்ஷாசாவிலிருந்து அந்நாட்டில் மொத்தமுள்ள 25 மாகாண தலைநகரங்களில் வெறும் நான்கிற்கு மட்டுமே தரமான சாலை மார்க்கமாக செல்ல முடியும் என்பதால், அங்கு விமானங்களின் தேவை அளவிடற்கரியது.

    ஆனால் டி.ஆர். காங்கோவிலுள்ள பெரும்பாலான விமான நிலையங்களின் உள்கட்டமைப்பு, போக்குவரத்து உதவி, கண்காணிப்பு உபகரணங்கள் மோசமான நிலையில் உள்ளன. அதுமட்டுமின்றி, அந்நாட்டில் மிகவும் பலவீனமான நிலையிலேயே தொழில்நுட்ப மற்றும் பாதுகாப்பு விதிமுறைகள் இருக்கின்றன.

    மிகவும் முக்கியமாக, டி.ஆர். காங்கோ நாட்டில் தகுதியற்ற நிலையில் உள்ள விமானங்களும், மிகவும் பழைய விமானங்களும் பெருமளவில் பயன்படுத்தப்படுகின்றன.

    விமானப் பணியாளர்கள் மற்றும் பராமரிப்பு ஊழியர்களின் மெத்தனத்தினாலும் சிக்கல்கள் எழுகின்றன. அவர்கள் பெரும்பாலும் கண்காணிப்பு மற்றும் கடுமையான ஒழுங்குமுறை தரங்களைக் கடைப்பிடிப்பதில்லை என்று குற்றஞ்சாட்டப்படுகிறது.

    அதுமட்டுமின்றி, அதிதீவிர மழை, புயல் உள்ளிட்ட மோசமான வானிலையினாலும் டி.ஆர். காங்கோவில் விமான விபத்துகள் அடிக்கடி நிகழ்கின்றன.
    உலகளவில் முதலிடம் வகிப்பது எந்த நாடு?
    கடந்த 2010 ஆம் ஆண்டு முதல் இதுவரையிலான காலகட்டத்தில் பார்க்கும்போது, உலகிலேயே அதிகளவு விமான விபத்துகள் நடைபெறும் நாடுகள் பட்டியலில் அமெரிக்கா முதலிடத்தை வகிக்கிறது. அதற்கடுத்தடுத்த இடங்களை ரஷ்யா, கனடா, மெக்ஸிகோ, இந்தோனீஷியா ஆகிய நாடுகள் வகிக்கின்றன.
    [​IMG]

    உலகின் மிகவும் பரபரப்பான விமான பாதைகளில் பலவற்றையும், அதிகளவிலான விமானப் போக்குவரத்து நெரிசலையும் அமெரிக்கா கொண்டுள்ளதால் அங்கு சிறிய தவறு நேர்ந்தாலும், மிகப் பெரிய பிரச்சனைகள் ஏற்படுத்துவதற்கான வாய்ப்பு அதிகளவில் உள்ளது.

    அதே சமயத்தில், 2010ஆம் ஆண்டுக்கு பிறகான காலத்தில், விமான விபத்துகளால் அதிக பேர் உயிரிழந்தவர்கள் நாடுகளின் பட்டியலில், 535 பேருடன் ரஷ்யா முதலிடமும், 520 பேருடன் இந்தோனீஷியா இரண்டாமிடமும் வகிக்கிறது.
    விமான விபத்து
    இவ்விரு நாடுகளிலும் விமானங்களின் பயன்பாடு பல்கி பெருகி வருகிறது. கடந்த தசாப்தத்தில் மட்டும் இந்த நாடுகளில் விமானப் பயணிகளின் எண்ணிக்கை பன்மடங்கு வளர்ந்துள்ளது. ரஷ்யாவில், 2009 முதல் இதுவரையிலான காலகட்டத்தில் விமானப் பயணிகளின் எண்ணிக்கை கிட்டத்தட்ட மூன்று மடங்காக அதிகரித்துள்ளது. இந்தோனீஷியாவில், இது நான்கு மடங்கிற்கும் மேலாக வளர்ந்துள்ளது.
    [​IMG]

    அதே காலகட்டத்தில் டி.ஆர். காங்கோவை போன்று நேபாளத்திலும் கிட்டத்தட்ட 180 பேர் விமான விபத்துகளில் உயிரிழந்துள்ளனர். இதற்கு காரணமாக நேபாளத்தின் கடினமான நிலப்பரப்பு, விதிமீறல்கள் மற்றும் விமானப் பாதுகாப்பு தொடர்பான பிரச்சனைகள் சொல்லப்படுகிறது.

    எனினும், டி.ஆர். காங்கோவை விட மூன்று மடங்கு அதிக விமானப் பயணிகளை கொண்டுள்ள நேபாளத்தில், விமானப் போக்குவரத்துத்துறை வளர்ச்சியை நோக்கி சென்றுகொண்டிருக்கிறது.

    உலகின் விமானப் போக்குவரத்தில் வெறும் 0.1%க்கும் குறைவான பங்களிப்பை கொண்டுள்ளது டி.ஆர். காங்கோ. ஆனால், கடந்த ஒன்பது ஆண்டுகளில் உலகம் முழுவதும் நடந்த விமான விபத்துகளில் 4% அந்நாட்டில்தான் நடந்துள்ளது. இதன் மூலம், அங்கு நிலவும் மோசமான சூழல் வெளிப்படுகிறது.

    இதன் விளைவாக, ஐரோப்பிய ஒன்றியத்திற்குள் டி.ஆர். காங்கோவை சேர்ந்த விமானங்கள் பறக்க தடைசெய்யப்பட்டுள்ளது. ஆனால், இந்த பட்டியலில் டி.ஆர். காங்கோ மட்டுமின்றி, ஆசியா, லத்தீன் அமெரிக்காவை சேர்ந்த 13 நாடுகளும் இடம்பெற்றுள்ளன.
     
  3. NATHIYAMOHANRAJA

    NATHIYAMOHANRAJA Well-Known Member

    Joined:
    Jul 27, 2018
    Messages:
    7,600
    Likes Received:
    523
    Trophy Points:
    113
    Gender:
    Female
    Occupation:
    HOME MAKER
    Location:
    CHENNAI
    ’காஸ்மிக் கிரிஸ்ப்' வருஷம் பூரா கெடாம இருக்கும் அறிய வகை ஆப்பிள்!!

    சுமார் ஓராண்டுக்கு கெடாமல் இருக்கும் என்று கூறப்படும் ஒரு புதிய வகை ஆப்பிள் விற்பனைக்கு வந்துள்ளது.


    குளிர்சாதனப் பெட்டியில் வைத்தால் சுமார் ஓராண்டுக்கு கெடாமல் இருக்கும் என்று கூறப்படும் ஒரு புதிய வகை ஆப்பிள் அமெரிக்காவில் விற்பனைக்கு வந்துள்ளது. இந்த வகை ஆப்பிளை கண்டறிவதற்கு ஆராய்ச்சியாளர்களுக்கு இரு தசாப்தங்கள் ஆனதாக கூறப்படுகிறது.

    'காஸ்மிக் கிரிஸ்ப்' என்று அழைக்கப்படும் இந்த புதிய வகை ஆப்பிளானது 'ஹனிகிரிஸ்ப்', 'எண்டர்ப்ரைஸ்' ஆகியவற்றின் கலப்பினமாகும். இது முதன் முதலில், 1997ஆம் ஆண்டு வாஷிங்டன் பல்கலைக்கழகத்தில் பயிரிடப்பட்டது.

    திடமான, மிருதுவான, சாறு நிறைந்த இந்த ஆப்பிளை கண்டறிந்து வணிகரீதியாக வெளியிடுவதற்கு சுமார் 72 கோடி ரூபாய் செலவிடப்பட்டுள்ளது. இந்த ஆப்பிளில் இனிப்பு, புளிப்பு ஆகிய இரு சுவைகளும் சமநிலையில் இருப்பதுடன், சாறு நிறைந்ததாகவும் உள்ளது.
    இவற்றின் சிவப்பு நிற தோலின் மேல் படரும் வெள்ளை நிற புள்ளிகள், இரவுநேர வானத்தை பிரதிபலிப்பதால், இதற்கு 'காஸ்மிக் கிரிஸ்ப்' என்ற பெயர் வந்துள்ளது.

    இந்த வகை ஆப்பிளை சரியான முறையில் குளிர்சாதனப் பெட்டியில் வைத்திருந்தால், பறிக்கப்பட்டது முதல், 10-12 மாதங்களுக்கு தரமும், சுவையும் குறையாமல் வைத்திருந்து சாப்பிட முடியும்.
     

Share This Page